Mostafa Nageeb

Optimist, technologist, curious, reader, and sometimes writer. Software Product Manager. Tweets in EN/AR.

مؤخرا عدلت لكذا حد الCV بتاعه والحمد لله بلا إستثناء كلهم جالهم إنترفيوهات بعدها وبعضهم بالفعل جاله شغل ، فى الثريد دة هشرح الأخطاء الشائعة اللى شوفتها وأنا بعدل للناس الCV عشان تعلو فرصكو ان يجيلكم انترفيوز. وهشير جزء من CV حد وهوريكم قبل وبعد.

أول خطأ هو استخدام الParagraphs بدل الBullets. الشخص اللى بيبص عالCV بيقرر فى 10 ثوانى ﻷنه مابيبقاش عنده وقت ومحتاج يبص على عشرات الCVs ، مشكلة الParagraphs إنها بتصعب الوصول للمعلومة ﻷنها بتكدس المعلومات فوق بعض. الBullets أسهل وأوضح فى استخراج المعلومات.

كل Bullet لازم تبدأ بفعل ماضى. لازم تعبر/ى عن الإنجازات والنتايج مش المسئوليات. شوفو مثلا الفرق بين Responsible for building our sales pipeline مقابل Built our sales pipeline مثال تانى Answering customer calls مقابل Handled customer calls

أمثلة للأفعال الماضية المفيدة: Built, led, designed, implemented, handled, managed, increased, decreased, improved, refactored, revamped, initiated, created, launched.

النقطة التانية اللى لازم تبان فى الBullets هى نتايج الأفعال دى ، أو مدى صعوبتها ، أو تأثيرها. نكمل عالأمثلة السابقة Built our sales pipeline from 0 to 300 customers, resulting in X in revenue. أو Handled customer calls with 87% satisfaction rate.

حاجة كمان مهمة لازم تبان خصوصا لو شغلتك تبنى حاجة زى الديفيلوبرز والديزاينرز إنك تبين/ى الأدوات اللى استعملتها لعمل الحاجة. مثال - Built the social login module. مقابل - Built the social login module using swift 5.2 and Facebook's REST API

النقطة اللى فاتت دى مهمة جدا كمان لسبب آخر ، كتير من الHiring Managers والRecruiters بيدورو على كلمات معينة زى مثلا إنهم عايزين حد شاطر فى Illustrator ، لما تبقى موضح دة هتعلى فرصك إن يجيلك انترفيوز. فى المثال السابق أنا كدة عرفت إنك فاهم Facebook API وبتستعمل أنهى swift version.

كمان كتير من الشركات بتستعمل سيستيمز بتقارن الCV اللى انت بعته بالJob description ولو لقو مفيش أى صلة بيبعتو ايميل رفض أوتوماتيك أو مش بيطلعوه للى هيفلتر الCV. فى صديقة كانت كل خبرتها Teaching Assistant غيرناها لSoftware Engineer/Teahcing Assistant. جالها 5 انترفيوهات فى اسبوعين.

لازم تبين الTools ، الScale ، الTechnologies ، الTeam Size ، حركت الحاجة من فين لفين (ممكن كنسبة مئوية أو رقم مطلق على حسب). بيع نفسك ﻷول recruiter آت. بيع خبراتك ومهاراتك.

طيب كام Bullet فى كل شغلانة؟ فى رأيى من 3-5 ويبقى فى تركيز اكبر على الشغلانة الحالية واللى قبلها ﻷن دول أول حاجة الناس بتبص عليهم .. كل ما الموضوع يبقى قديم ممكن تقلل فى التفاصيل أو حتى تحط bullet واحدة.

تعمل قسم للProjects ولا ﻷ؟ لو ليهم علاقة بشغلانة معينة يبقى يتحطو جوة تفاصيل الشغلانة ك bullets ، لو مالهمش علاقة ممكن تعملهم قسم.

طب One ولا Two columns؟ ... أنا شخصيا بستعمل Two columns بس بردو من مميزات الOne Column إن الفونت بيبقى كبير شوية وحلو كدة فبتقرا اسهل من غير تشتيت. المهم إن مهما حصل الموضوع مايزدش عن صفحتين لو خبرتك أقل من 10 سنين.

لو استعملت One Column وبتقدم على شغلانة ليها علاقة بدراستك خلى الدراسة فى الأول عشان لو اللى بيعين مشترط دة تعدى checkbox انك درست حاجة ليها علاقة بدل ما تتعبه إنه يسكرول للآخر عشان يكتشف المعلومة. لو الدراسة مالهاش علاقة بالشغلانة ادفنها بعد الexperience عادى.

الفونت لازم يبقى واضح والمسافات بين السطور تسهل القراية. ماتحطش Marital Status ولا ديانة. الصورة عليها اختلاف. فى ألمانيا بيحبوها. فى أمريكا بيكرهوها. لو الشغلانة فيها تعامل مع زباين بشكل مباشر زى المبيعات أو كدة غالبا الصورة مهمة.

وأخيرا وليس آخرا عايز أفرجكم على CV أحد الأصدقاء اللى تفضل شاكرا ووافق إنى أشير الصور دى من الCV قبل وبعد. مكانش بيعدى الscreening بعدها بأسبوع بقى فى البروسيس مع 3 شركات. الموضوع مش صعب بس عايز تركيز وتجربة وتعديل على حسب النتايج. أتمنى الثريد يكون مفيد وبالتوفيق للجميع.





Download PDF

Add a comment

Similar news