Ahmed Abdelkhalek

#Excel #VBA Developer @Upwork Learning German Tweets in en, ar, de

في الثريد ده هكتب ازاي تبدأ career علي @Upwork بشكل صحيح يساعد على الربحية والاستدامة في المستقبل. 👨‍💼👩‍💼 وده موقع/منصة بيساعدك انك تعرض شغلك وتقدم خدماتك على الانترنت بمقابل مادي وعليه آلاف الشركات واكتر من 100 ألف freelancer. وبالتالي هو سوق مفتوح وفيه فرص ممكن نستغلها.

هكتب في الثريد ايه الخطوات اللي ممكن تعملها والأخطاء اللي تحاول تجنبها. مراحل الكارير على الموقع والمصادر المفيدة. بحيث ان يكون عندك بيزنس قوي خاص بيك ومش مجرد شغل بدون مدير. Remember: Well begun is half done

هقسم الثريد للكلام عن نقاط عامة ثم عن 3 مراحل لبناء كارير علي Upwork: -الأولى: تجهيز نفسك للشغل عليه وتقوية المهارات بتاعتك. -الثانية: ازاي تعرف اكتر عن Upwork وبيئه العمل الخاصة بيه. -التالته: اول فترة ليك شغل علي الموقع.

اب ورك موقع صعب والمنافسة فيه قوية ومش هينفع معاه الفهلوة, ولو نفعت مش هتكمل بنسبة كبيرة. ليه انا بكتب ده في الاول؟ لان في ناس بتكون عاوزة فلوس وخلاص وهشتغل أي حاجه. أنا اسف بس فعلا مش هعرف اساعدك. مشفتش في مصر حد وصل top rated وهو شغال data entry مثلا لان المنافسة على السعر.

فده بيزنس جديد علشان تبداه محتاج وقت ومجهود.🤷🤷🤷 محتاج تديله أولوية في حياتك وتخصصله وقت معين كل يوم مثلا. زي اي مشروع محتاج (*مخاطرة* ,راس مال, دراسة الجدوى والسوق, تحديد منتجك, التسويق) وبرضه بدون over thinking.

نقاط متفرقة: -حاول تلاقي دعم قوي من ناس حواليك. في ناس بتقف في نص الطريق وبيكون ناقصها شوية ثقة. لو حد بيتريق عليك متكلمش معاه في الموضوع تاني. -لما تشتغل الفلوس هتجيلك. ركز على الشغل وسيبك من البنوك الالكترونية -واه تقدر تفتح بيه بيت. بس ابقي قابلني لو حد رضي يجوزك بنته 😅

-خلي طموحك عالي وبرضه متصدقش اللي يقولك 10 آلاف دولار في شهرين.🤑 -اب ورك بيشجع التخصص جدا سواء وانت بتبدا بروفايل او شغال. -هو مكان مناسب لو حبيت تغير الكارير بتاعك وتبدأ حاجة جديدة -منه تقدر توصل للحرية المادية اللي تخليك تعمل اللي انت عاوزه/ انتي عايزاه

نبدأ بمراحل الكارير: المرحلة الأولي: انك تكون في عندك مهارة بتعرف تعملها فعلا سواء كنت شغال فيها او هواية. لو عندك المهارة دور علي النت واطلب من حد انه يقيم لك شغلك وايه ممكن تعمله احسن. لو معندكش دور واختار حاجة من المجالات الموجودة على الموقع وذاكرها 3-9 شهور .

اغلب العملاء من أمريكا و أستراليا ونسبة الثقة بتزيد لو الشخص بيتكلم كلام واضح. بالإضافة للمهارة فأنت محتاج تكون بتكتب/تتكلم انجليزي كويس. فلو مستواك كويس تمام. لو لا فاستثمر جزء من وقتك وفلوسك في انك تتكلم مع مدرس اون لاين

في المرحلة ديه والمراحل الجاية: انت ممكن تبعت لأي حد سؤال بخصوص شغلك او موقف ما. حاول متبعتش سؤال مبهم. يعني مينفعش بايثون ولا جافا الافضل تسال: انا عندي مشروع … وتكتب شوية عن مواصفاته وتوضح انك دورت على جوجل ومحتار في الاختيار بينهم. ليه؟ علشان تلاقي اجابه تفيدك.

المرحلة الأولي هدفها أن يكون عندك portfolio تظهر فيه مهاراتك وتقدر تعرضه علي عميل المستقبل وبيه يثق في شغلك. ممكن تعمله من مشاريع سابقة او لو ليك connection من نفس الفئة المستهدفة جرب تعرض عليه شغلك علي حاجة بدون مقابل. علشان تقدر تعرف اكتر "العميل عاوز ايه".

المرحلة الثانية: عارف انك دلوقتي عاوز تبدأ البروفايل دلوقتي وتشتغل وتكسب بس لسه. المرحلة ديه ممكن تاخد شهر وهدفها تدرس السوق وتتعلم ازاي تشتغل فيه ولو تعرف تتكلم مع freelancers تانيين. تحدد هدفك اكتر وسعرك المبدئي وتحدد شريحة عملائك وهدفك.

جهز نوتة أو google doc واكتب فيها ملاحظاتك عشان متنساش. وعامة اكتب تجربتك مع كل كورس/عميل على الموقع حتى لو مكملش معاه علشان تتعلم من أخطائك ونجاحاتك وتشيرها معانا في المستقبل. حاليا هتشوف الكورس علشان تاخد فكرة و*تطبق* حاجات بسيطة. لما تشتغل هتتفرج عليه تاني علشان تطبق منه اكتر.

دراسة السوق المقصود بيها, تحدد مهارتك وتكون عارف ال Keywords بتاعتها. تدور جوه اب ورك علي شغل بالمهارة ديه: ايه المطلوب بالظبط وبكام. وبرضه تدور في بروفيلات ال freelancers التانيين. شغالين علي ايه ومتوسط السعر كام. تشوف ال portfolio بتاعهم. (تستلهم منهم مش تنسخ شغلهم).

من الكورسات و بروفايلات ال freelancers الآخرين: -هتقدر تكتب درفتات و عناوين لل overview, proposal, portfolio item وتحسنها مع الوقت. -وبرضه هتتعلم شوية عن طرق التسويق والتواصل والتفاوض والتسليم للعميل. -هتحدد milestones للكارير. -وتتعلم شوية قواعد للشغل على Upwork

ديه ترشيحاتي او دور بنفسك (ودة الافضل) -كورس Seth Godin عن ال freelance والبلوج بتاعة عامة -قناة احمد مسعد وبروفايل الفيس بوك بتاعه -بلوج Danny Margulies -قناة John Morris تجنب انك تعيد في نفس الكورسات من مصادر مختلفة

من نتائج المرحلة الثانية: -انك تكون جهزت ال overview بتاعتك. تكتبها بطريقة تكون مركزة على العميل مش علي نفسك. هو ميهموش عدد سنين الخبرة بتاعتك في الغالب ولا ال 20 tool اللي بتستخدمها. اللي يهمه هيستفيد منك ازاي؟ -مجهز ال portfolio بتاعك بشكل جذاب وواضح. -عندك تصور للمستقبل.

المرحلة التالتة: انك تعمل اكونت على الموقع. (احفظ الـ secret answer من فضلك) وحاول توصله ل 100% قبل ما تقدم. ابدأ بروفايلك بسعر متوسط. 20-30$ متحطش اكتر من 4-5 مهارات وتكون مترابطة. يعني مينفعش translation, database, java

فاكر ال connection اللي عملته شغل في أول الثريد؟ في خاصية جديدة في اب ورك وهي انك تطلب feedback من حد اشتغلت معاه برة الموقع. كلمه قوله انك محتاج منه testimonial. يوضح فيها تجربته معاك في التواصل وجودة المنتج. وفي جزء أعمالك السابقة/وظايفك متكتبش مسئولياتك ولكن انجازاتك بالأرقام.

في المرحلة ديه ال word of mouth 📢🗣️ مهمة جدا. أول عميل ليك لو راضي هيتكلم عنك مع حد تاني وهكذا (وانت اطلب منه). فتوفر وقت البحث عن شغل. برضه حاول تشترك في communities للموقع علي facebook/reddit, او مجموعات الواتساب اللي في مصر. اشرحلهم انت بتعمل ايه واشترك في الحوار معاهم

-غالبا هتحتاج تشتري connects عشان تقدم على شغل. -متقدمش علي job post بالفعل قدم عليها 20 شخص قبلك. ودور على حاجة مناسبة ليك وفي تخصصك. -متبعتش للعميل تقوله أنا مهتم بمشروعك. الافضل تبعتله أسأله عن تفاصيل المشروع واقتراحات للشغل و الvision للمشروع وهو هيقدر اهتمامك.

عادي انك تقابل عميل سيء, حاول تجنبه حفاظا على حماسك وصحتك النفسية لانه فعلا ممكن يبوظ الكاريير بتاعك او يرجعك خطوات للخلف. هتلاقيه مثلا قلقان في موضوع السعر دايما وعاوز الارخص او عنده مشاكل ثقة فيك وبيتدخل في شغلك دايما. معندوش حفاظ على الحدود وعايز يتكلم علي طول وفي أي وقت.

نهاية المرحلة التالته انك تكون: -اشتغلت على 5 مشاريع مثلا. 🥳 -فهمت عملائك وقدرت تصنفهم لشرائح. -تكون جربت تشتغل مع صناعات مختلفة. -تكتشف نفسك اكتر وايه الشغل اللي يناسبك وتتخصص -ال professional network بتاعتك تعرف عنك أكثر وعن شغلك. -تبدأ العملاء تدور عليك وتبعتلك invitations

ديه تجربتي الشخصية في البروفايل بتاعي وتجارب freelancers آخرين بس مفيش حاجة صح 100%. جرب ولو في أسالة او عايز تفاصيل اكتر عن شيء معين رد على التويت المرتبطة بسؤالك. وريتويت لو عجبك 🙏 بعد كده الموضوع متشعب وكل واحد حسب أهدافه ومناقشاته وفكره وقدرته بيقدر يكون تصور مختلف للمستقبل

Download PDF

Add a comment

Similar news